Karmøy på tredjeplass: – Heiltid er blitt normalen

Hovudtillitsvald for Delta i Karmøy kommune, Camilla Sandhåland (t.v.), ordførar Leiv Arne Marhaug og 1. nestleiar i Delta, Marit Solheim.

Sist oppdatert:

Publisert:

– De har lukkast med å etablere heiltid som normalen. Det sa Marit Solheim, 1. nestleiar i Delta, då ho overrekte pris for godt heiltidsarbeid til ordførar i Karmøy kommune, Leiv Arne Marhaug.

Karmøy kommune er tredje best i landet på utlysing av heile stillingar for helsefagarbeidarar. Kommunen lyste i fjor ut 55 prosent av sine helsefagarbeidarstillingar i heiltid.

– Kommunen vann same kåring i fjor, men ein plass på pallen i år, viser at ein har etablert ein god kultur for heiltid, det skal de vere stolte av, sa Solheim.

Ho understreka betydninga av heiltid både for rekruttering til yrket, likestilling, arbeidsmiljø og kvaliteten på tenestene.

SJEKK DIN KOMMUNE: Prøv Deltas heiltidsmonitor

Artikkelen held fram under faktaboksen

Slik er kåringa gjennomført

Følgjande kommunar er med i finalefeltet, i alfabetisk rekkefølgje:
Arendal, Bodø, Gran, Hadsel, Hamarøy, Karmøy, Ringerike, Sogndal, Sola, Stad og Sunnfjord.

Plassering
(prosent heiltidsstillinger lyst i 2024 i parentes)

1. ?
2. ?
3. Karmøy
4. Arendal
5. Hamarøy (50 %) og Hadsel (50%)
6. Sunnfjord (48 %)
7. Sogndal (48 %)
8. Stad (48 %)
9. Bodø (46 %)
10. Sola (46 %)

Tallene viser hvor stor andel av de totalt utlyste helsefagarbeiderstrillingar i 2024 som var heltidsstillingar. Gjennomsnittet for norske kommuner var 30 prosent.

Slik har vi kommet fram til kandidatene:

Vi har teke utgangspunkt i Deltas heiltidsmonitor, som er levert til oss av Retriever. Der blir alle utlysingar i kommunar innanfor fleire yrkesgrupper registrerte. Vi har valt å konsentrere oss om helsefagarbeidarar, og har sett som kriterium at den enkelte kommune har lyst ut minst 50 helsefagarbeidarstillingar i løpet av 2024.

Heiltid er vinn-vinn for alle partar

Ordførar i Karmøy Leiv Arne Marhaug (H) takka for heideren og diplomet, og lova å jobbe for å kome seg opp på topplassen igjen.

Han understreka betydninga av heiltid som eit fundament for trivsel og godt arbeidsmiljø.

– Det er av stor betydning for bebuarane og brukarane av tenestene at dei ikkje har altfor mange tilsette å forholde seg til. Heiltid gir betre kvalitet og er vinn-vinn for alle partar, sa han.

Han nytta også høvet til å takke alle som har vore med og fått til dette resultatet og dei som kvar dag står på i dei kommunale helse- og omsorgstenestene.

Artikkelen held fram under videoen

Godt partssamarbeid

Hovudtillitsvald for Delta i Karmøy kommune, Camilla Sandhåland, har jobba mykje med heiltid og særleg årsturnus dei siste åra.

– Heiltid handlar om eit godt partssamarbeid. Sammen er vi ganske gode til å sørge for at stillingane no lysast ut som heiltid. Som tillitsvalde seier vi frå dersom det ikkje blir lagt opp til heiltid. Det skal svært gode grunnar til å ikkje følgje opp.

Ho jobbar også mykje med å fylle opp stillingar for sine medlemmar som jobbar deltid.

Er du ikkje medlem i Delta?

Bli med og få alle fordelane du òg.

Går sakte framover

– Heiltidsutlysingar er ikkje heile svaret på heiltidskultur. Men det er ein avgjerande start, ikkje minst fordi det er så viktig for rekrutteringa til yrket. Og at dei som vil bli helsefagarbeidarar kan få tryggleik for at det er mogleg å finne ein heiltidsjobb når ein har fått fagbrevet, seier Marit Solheim.

Delta har dei siste tre åra kåra Noregs beste kommunar på utlysing av heiltidsstillingar for helsefagarbeidarar. Då vi starta med dette var under 20 prosent av stillingane utlyst som heiltid. No kryp det sakte oppover. I 2024 var landsgjennomsnittet for norske kommunar på 30 prosent.

Det går sakte men sikkert framover. Gjennom å trekkje fram dei som lukkast i heiltidsarbeidet håper vi at vi er med på å dra dette ytterlegare framover, seier Marit Solheim.

Derfor er heiltid viktig

Heiltid gir auka kvalitet i tenestene ved at dei tilsette er meir på jobb og blir betre kjende med tenestemottakarane og desse får færre å forhalde seg til.
Heiltid bidrar til betre arbeidsmiljø, sterkare fagmiljø og lågare sjukefråvær.
Heiltid gir økonomisk og kvalitetsmessig gevinst, ved mindre bruk av overtid, vikarar og innleige.
Heiltid gir dei tilsette ei lønn det er mogleg å leve av.
Utstrakt bruk av deltidsstillingar har store konsekvensar for den enkelte sin levestandard og livskvalitet.
Heiltid er bra for å behalde og rekruttere tilsette.
Heiltid fremmer likestilling.
Heiltid er bra for å auke kompetansen og dermed kvaliteten i tenesta.