Lønnsoppgjeret 2025 har starta: – Delta krev reallønnsvekst

Delta og YS krev reallønnsvekst i frontfagsoppgjeret. Her er 1. nestleiar Marit Solheim, YS-leder Hans-Erik Skjæggerud og 2. nestleiar i Delta Ola Yttre er klare for forhandingar med NHO.
Delta og YS krev reallønnsvekst i frontfagsoppgjeret. Her er 1. nestleiar Marit Solheim, YS-leder Hans-Erik Skjæggerud og 2. nestleiar i Delta Ola Yttre er klare for forhandingar med NHO.
Sist oppdatert:
Publisert:

– Vi krev betydeleg reallønnsvekst, slik at alle sit igjen med meir i lommeboka, seier 1. nestleiar Marit Solheim i Delta.

Fredag 14. mars starta lønnsoppgjeret i NHO-området (frontfaget). Årets lønnsoppgjer er med det i  gang. I år er det mellomoppgjer, og det inneber at det først og fremst skal forhandlast om pengar. 

– Det er naudsynt med eit betydeleg lønnsløft i år. Etter fleire år kor høg prisvekst har ete opp lønnsveksten, fekk vi i fjor gjennomslag for reallønnsvekst. Men vi treng meir enn eitt godt oppgjer for at det skal merkast etter tøffe år, understrekar  Solheim som representerer Delta-medlemane i NHO-området.

Delen som går til lønn må opp

Frontfaget er viktig også for offentleg tenesteyting fordi det legg ei økonomisk norm  for lønnsveksten  i dei følgjande oppgjera.

Økonomien i Norge går godt, sjølv om uroa internasjonalt aukar. Den delen av industrien som konkurrerer med utlandet har store overskot, og  verdiskapinga i industrien som går til lønn har historisk aldri vore så låg som no.

– Vi meiner meir av verdiskapinga  i bedriftene må fordelast til arbeidstakarane, seier Solheim.

Fleire oppgjer i april

Forhandlingane mellom YS og NHO har frist 18. mars. 

Lønnsoppgjeret fortset i april  med Deltas store område, kommune,  Spekter  og stat, og ei rekkje andre tariffområde.

Oppstart NHO krav.jpg
14. mars utvekslet YS og NHO krav. Dermed er årets lønnsoppgjør i gang. T.v. NHO-direktør Ole Erik Almlid og t.h. YS-leder Hans-Erik Skjæggerud. Foto: Martin Müller

 

Delta sine forhandlingar i NHO-området

  • Forhandlingsdelegasjonen frå Delta består av 1. nestleiar Marit Solheim, 2. nestleiar Ola Yttre og spesialrådgjevar Sveinung Berger frå arbeidslivsavdelinga i Delta.
  • Dette er eit samordna oppgjer. Det betyr at det blir forhandla samla for alle tariffavtalar som er inngått mellom YS-forbund og NHO. Også dei seks NHO-tariffavtalane Delta er part i blir omfatta av forhandlingane.
  • Ein tredel av Deltas medlemmer innanfor NHO er omfatta av Funksjonæravtalen. I mellomoppgjeret er denne avtalen ikkje ein del av dei sentrale forhandlingane, for Funksjonæravtalen er det berre lokale forhandlingar.