NHO-oppgjeret 2023: Du skal sitte igjen med meir i lommeboka

Måndag 27. mars starta lønnsoppgjeret i NHO-området (frontfaget) og med det er årets lønnsoppgjer i gang. I år er det mellomoppgjer, og det inneberer at det først og fremst skal forhandlast om pengar. YS har overlevert krava, ein kombinasjon av sentrale tillegg, betring av minstelønnssatser og garantiordningar som fremjer likelønn og motverkar lågtlønn.

Medlemmenes kjøpekraft må aukast samanlikna med i fjor. Større overskot til eigarane og meir i bonus og leiarlønningar syner at det er rom for at også dei tilsette kan ta ut sin del av verdiskapinga.

- Norsk økonomi går godt, men våre medlemer får stadig mindre i lommeboka. Sånn kan det ikkje halde fram, seier Deltas nestleiar og forhandlingsleiar for Delta-medlemmene i NHO-området, Marit Solheim.

- Utteljing på lønnsslippen betyr mykje for å sikra rekruttering. Dette er yrke som yter velferda i samfunnet vårt, seier ho.

Velferda vert skapt av menneske, dei må ha ei lønn å leve av.

(Saka fortset etter videoen)

Delta forklarar mellomoppgjeret

- Krev større del av verdiskapinga

Medlemmene har sakka akterut og fått mindre igjen i lommeboka med reallønnsnedgang for andre år på rad. Lønnsforskjellene mellom grupper, og mellom kvinner og menn, har auka. Det viser berekningane etter lønnsoppgjeret i fjor.

Lønnsauken i industrien har vore betydeleg høgare enn frontfagsramma dei siste tre åra. YS stiller seg bak frontfagsmodellen, men da må anslaget for lønnsauken i frontfaget vere truverdig.

- Mange av våre medlemer i privat sektor har opplevd dårleg lønnsutvikling dei siste tre åra. Vi krev at partane vert einige om løysingar for desse gruppene, seier forhandlingsleiaren i Delta.

Fakta om Delta sine forhandlingar i NHO-området

• Forhandlingsdelegasjonen frå Delta består av nestleiar Marit Solheim og spesialrådgjevar Sveinung Berger frå arbeidslivsavdelinga i Delta.
• Dette er eit samordna oppgjer. Det betyr at det vert forhandla samla for alle tariffavtalar som er inngått mellom YS-forbund og NHO. Også dei seks NHO-tariffavtalane Delta er part i vert omfatta av forhandlingane.
• Ein tredel av Deltas medlemmer innanfor NHO er omfatta av Funksjonæravtalen. I mellomoppgjeret er denne avtalen ikkje ein del av dei sentrale forhandlingane, det er berre lokale forhandlingar.

  Fristen for NHO-oppgjeret 2023 er 30. mars kl. 24.00