Delta meiner: Organiseringa av tannhelsetenesta må byggja på fagleg vurdering
Utan konsekvensutgreiing har Stortinget vedtatt å flytta den fylkeskommunale tannhelsetenesta til kommunane. Vedtaket seier ikkje noko om aktuell kommunestørrelse, økonomisk lønsemd eller faglege konsekvensar.
Det tannhelsefaglege miljøet meiner det trengs større overordna miljø for å få ei teneste som fungerer optimalt til det beste for befolkninga. Dette er støtta av blant andre Kommunenes Sentralforbund (KS), Arbeiderpartiet og Senterpartiet.
Delta er alvorlig bekymra for at:
- Brukarane skal få eit redusert tannhelsetilbod, spesielt på det helsefremjande og førebyggjande området
- Langsiktige planar innafor folkehelsearbeidet forsvinn lett i små kommunale einingar. Med avgrensa økonomi kan behandling lett bli prioritert føre helsefremjing
Suksessfaktorar i den fylkeskommunale tannhelsetenesta er blant anna:
- Systematisk, koordinert og langsiktig førebyggingsarbeid overfor ein større befolkningsmasse
- Godt behandlingstilbod for ulike grupper i befolkninga
Gjennom kommunesamanslåing ønsker regjeringa større og meir robuste fagmiljø som skal koma innbyggjarane til gode med auka kvalitet og stabilitet i tenesta. Vedtaket om å overføra tannhelsetenesta frå fylkeskommunen til kommunen kan føre til det motsette:
- Det vesle fagmiljøet vert splitta opp i enda mindre einingar
- Det er førebels ikkje planlagt nokon form for koordinering mellom kommunane
- Det kan lett bli store skilnader i tannhelsetenestetilbodet mellom kommunar i same fylke
- Resultatet kan bli dårlegare tannhelse på individnivå og på gruppenivå
- Kommunereforma kan lett føra til ei nedbygging av den offentlege tannhelsetenesta i Norge sjølv om intensjonen er den motsette
Resolusjonen vedtatt av Deltas representantskap 2015.